الاثنين، 24 فبراير، 2014

أمنياتى !

مدونتى العزيزة
هلا بيكى و غلا و حشتينى و الله بقالى كتير ما طلتش عليكى
معلش بقى اعذرينى مكنتش عارفه هاجى أقولكـ ايه ...
حاجات كتير حصلت كانت تتطلب انى آجى أحكيلكـ
و أشتم هنا شويه بس مفيش وقت بقيت عامله زى اللى شغاله فى ساقية
شغل - اكل - نوم و هكذا ... روتين سخيف لا يكسره الا لقاء بعض الاصدقاء كل فترة
 بغض النظر عن كل ده !
انا الحمد لله ساتسفايد الفترة دى أى نعم محتاجة أركز شويه فى الشغل بس فترة و هتعدى
 فى حاجات كتير مصيرية كتير بتحصل بس انا من الشخصيات اللى ما بتعرفش تاخد قرار بسهولة
و يمكن تكون دى عادة مش كويسة !!

المهم

انا قررت أكتب الحاجات اللى بتمناها فى حياتى يمكن لما اشوفها قدامى اعرف احققها :

 أروح أحج .. فعلا من أكتر الامانى اللى نفسى أحققهـــا.. يا رب حققهالى :)

أروح لندن و باريس ... من كتر ما قريت عنهم حاسه انى لو رحتهم مش هيبقوا غراب عليا :D

و طبعا الامنيات اللى فوق مش هتتحقق من غير طيارة فانا نفسى أركب طيارة  و منطاد  :D

عايزة برده اتعلم لغات كتيييييييييييييير فرنساوى و ايطالى و اسبانى و صييييييينى :)))

نفسى أعمل اللى انا عايزاه من غير ما آخد اذن حد و لا اضطر اقول مبرر لحد  !!

نفسى اعيش فى مكان نضييييييييييييييييف من غير الفاظ تقرف و لا مناظر تقرف و لا تلوث من اى نوع .. طبعا ده من سابع المستحيلات :D

نفسى ا عرف انا عايزة اييييييييييييييييييه ؟؟؟!! :-/

الكلام اللى فوق يدل على شخصيه سايكو درجه اولى بس ما علينا ده كل اللى فاكراه حاليا ...

يلا محدش بياخد أكتر من نصيبه

اقعدى بالعافية يا مدونتى العزيزة

الى اللقاء :)

الجمعة، 27 ديسمبر، 2013

Coming Soon !

Along time has passed without being here :(
Coming Soon !

السبت، 15 يونيو، 2013

:(



جايز ظلام الليــــل يبعدنــا يوم 

إنمــــا

يقدر شعـــــاع النور يوصل 

لأبعد سمـــــــــــــا !!!!

الأربعاء، 20 فبراير، 2013

أنــــا !!

طلبت معايا أكتب عنى  بما انى شخصية مهمة و مؤثرة فى المجتمع :)))

أنا كائن بشرى عادى جدا زى أى انسان ليه قلب و عقل و ايدين و رجلين .

كان نفسى أعيش فى الزمن بتاع الشياطين  الــ 13 و المغامرون الخمسة وأدهم صبرى !!

الزمن اللى كان كل حاجة فيه جميلة الناس , البيوت , الأخلاق و الذوق و حاجات كتيره أوى 

 حتى الآن بحب مجلات ميكى و ماجد و أفلام الكارتون و الأنيميشن :D 

بحب أعيش الحياة ببساطة ما بحبش الكلكعة .

بحب أعمل أى حاجة تيجى فى بالى اتنطط أغنى أجرى ألعب أى حاجة فيها هبل و خلاص ^_^

ما بحبش أضايق نفسى أو أشيل هم أى حاجة  :)

فيا عادة سخيفة انى ما بعرفش أقول ايه اللى مدايقنى !!

ممكن أدايق من حاجة و ما اقولش و افضل كاتمه فى نفسى

و حاجه و را حاجه و را حاجة .....

تخلينى انفجر و أضطر إنى أعيط و انا ما بحبش أعيط :(

ما بحبش النكد و لا هو بيحبنى 

بس ساعات بتطلب معايا كآآبه و نكد أفتكر أى حاجة تنكد عليا و اتنكد عاااااااااااااادى خالص 

اكتشفت بقى مؤخرا ان اللى ما بيقدرنيش بيطلع من حساباتى للأبد .. هو اللى ابتدى 

 بحب أوى جملة طظ فى أى حد و أى حد طظ فيه .. بس ده فى حالة ان الحد ده هيدايقنى 

و أكيد اللى أهمهم مش هيزعلونى و يدايقونى و كمان الجملة دى مش لأى حد بحبه و يهمنى 

لأن حتى لو حد بحبه دايقنى أو زعلنى أكيد بيبقى غصب عنه !

ساعات ببقى فاهمه كل حاجه و مدكنه " سوسه يعنى " و ساعات تانيه ما ببقاش فاهمه اى حاجه فى أى حته !؟

ساعات ببقى جريئة و وقحة و ممكن أقول أى حاجة 

و ساعات تانيه أكره الصراحة اللى ممكن تقلب لوقاحة ! 

و طبعا محدش فاهم حاجة و لا حتى انا :)))

بس خلاص كفاية كده ايه هو انا هاكتب سيرتى الذاتية ؟!

اقعدوا بالعافية :))))







الأحد، 20 يناير، 2013

نفسى !


نفسى الناس تبطل تتنبألى بمستقبلى !

نفسى يشغلوا مخهم و يفكروا بعيدا عن العادات و التقاليد !

نفسى يبطلوا معاملة الانسان الآلى اللى بيعاملوها للبنى آدميين  !

نفسى كل حاجة تمشى زى ما انا عايزة !

نفسى  كلمة المفروض دى تتلغى من القاموس بتاعنا
عشان انا ماشيه بمبدأ كل المفروض مرفوض!

نفسى نسيب كل واحد يعمل اللى هو عايزه و ما نتدخلش فى قرارات أى حد
مش معنى كده اننا مثلا مش هنستشير اللى حوالينا
لا هنستشير و نسمع من ده و من ده بس فى الآخر القرار يبقى مننا احنا !

نفسى ما يجيليش برد أبدا أبدا :( !

نفسى فى حاجات كتير أوى بس مش فاكراها دلوقتى !





الجمعة، 16 نوفمبر، 2012

و لا حاجة !!

ازيكـ يا مدونتى يا حبيبيتى وحشتينى و الله 
بقالى كتير عايزه اكلمكـ و مفيش وقت سامحينى بقى 
طبعا نفسكـ تعرفى ايه اللى جابنى انهارده و ايه اللى فكرنى بيكى 
يا ستى كل ا لحكايه انى عايزه اشتم المجتمع الزباله ده شويه 
و بدل ما اكتم فى نفسى قلت اجى احكيلكـ هاعمل ايه يعنى اطق و لا اطق ؟!
من زمان و انا بحب اعاند فى ام المجتمع المتخلف ده اللى كل حاجه فيه غلط و عيب و ما يصحش 
مجتمع ذكورى متعفن كل حاجه البنات بتعملها غلط و عيب و خلى بالكـ انتى بنت ما ينفعش انكـ تعملى كده 
ساعات بيبقى فى حاجات صح و حاجات تصنف على انها خوف فى الزمن الأخبر ده

بس مش كل الحاجات بتبقى خوف  فى حاجات بتبقى العادات و التقاليد بتقول ما ينفعش !
أبو ام العادات و التقاليد اللى هتخلينا مرضى نفسيين و متخلفيين عقليا !!
كفاية عليكى كده انهارده 
متأكدة انى هاجيلكـ تانى قريب جدا 
اقعدى بالعافية :D


الخميس، 26 أبريل، 2012

دلع نفسكـ !

دلع نَفسك ما تستناش حد يدلعك ...

بمعنى ... إنك لو نفسك حد يقولك كلمة حلوة أو يهنيك على حاجة انت عملتها حلو مثلاً وماحدش عمل كده .. بدل ما تضايق نفسك قول لنفسك تسلم ايدي ...
كافئ نفسك لو عملت حاجة كويسة .. اعمل لنفسك الحاجات اللي بتحبها وهكذا ...

وعلى فكرة .. لما تدلع نفسك هتلاقي الناس بتدلعك ...

عجبنى أوى البوست ده 

  دلعوا نفسكم بقى :)